Ciidamo  maanta lagu weeraray Muqdisho.

(Mogadishu, Wednesday ,14,May 2008,(Hornafrik Media)

Ciidamo ka tirsan dowladda kmg ah ee soomaaliya iyo kuwa Itoobiya ayaa maanta si gooni gooni ah qaraxyo la gula beegsaday magaalada Muqdisho halkaasoo ay ka dhasheen khasaare dhimasho iyo dhaawac leh.

Barqanimadii maantay ayaa gawaari ay wateen ciidamo itoobiyaan ah oo marayay isgoyska Towfiiq ee degmada yaaqshiid waxa halkaasi la gula beegsaday qarax Bambaano oo nuuca gacanta laga tuuro ah.

Ciidamada itoobiya ayaa sida la sheegay waxa halkaasi ka soo gaaray khasaare isagu jira dhimasho iyo dhaawac iyadoo markaasi kadibna rasaas ay fureen qaar kood dad rayid ah ay ku dhaawacmeen.

Askari ayaa la xaqiijiyay in ciidamada itoobiya uu ka dhintay halka mid kale uu ka dhaawacmay waxana rasaasta ay fureen ku dhaawacmay labo qof oo rayid ah kuwaas oo mid ahayd haweenay.

Dhinaca kale sadex qofood oo rayid ah ayaa ku dhaawacmay meel ka ag dhaw saldhiga galbeed ee degmada dharkeenley. Kadib markii halkaasi lagu weeraray askari ka tirsan ciidamada dowladda kmg ah wallow askarigaasi aysan wax dhibaato ah soo gaarin.

Ma ahan markii ugu horeysay oo falal nuucaan ah ay ka dhacaan Magaalada Muqdisho iyadoo ay arrimahaani ka noqdeen caasimada qayb ka mid ah nolol maalmeedka dadka.