Dowlada kmg ah oo dabacsanaan muujisay iyo Mucaaradka oo doonaya in ciidamada itoobiya laga saaro Dalka.

(Mogadishu, Tuesday,13,May 2008,(Hornafrik Media)

Dhagayso wareysiga oo dhan.

Dowlada kmg ah ee soomaaliya ayaa ugu baaqday mucaaradka ka soo horjeeda inay sharuudaha ka saaraan wadahadalada la doonayo in la isu soo hor fadhiisiyo wufuuda labada dhinac ee kusugan dalka jabuuti.

Shir ay ka wada qayb galeen wefdi ka socda dowlada kmg ah ee soomaaliya iyo ururka dib u xoreynta soomaaliya ayaa shalay galinkii dambe ka furmay magaalada Jabuuti ee dalka Jabuuti.

Shirkaasi oo Mas'uuliyinta labada dhinac ay Khudbado ka wada jeediyeen ayaa dhinaca dowlada kmg ah waxa ka muuqatay xoogaa dabacsanaan ah.

Wasiirka dib u heshiisiinta Dowladda KMG ah C/risaaq Ashkir Cabdi oo ah ninka hogaaminaya wefdiga dowladda ee jabuuti shirka u tagay oo xalay u waramayay Idaacada iyo TV-ga HornAfrik ayaa ugu baaqay mucaaradka inay si sharuud la’aan ah u aqbalaan wadahadalo fool ka fool ah oo ay isugu yimaadaan dhinacyada soomaalidu.

“Waxan jecelnahay inaan la xaajoono walaalahayo ilaa xaalada ugu dambaysa aanu la gaari karno taasina markaan is horfadhiisano ayay bilaabanaysa”. sidaasi waxa sheegay.wasiirka dib u heshiisiinta.

Dhan kale ururka dib u xoreynta soomaaliya ayaa mar kale ku celiyay inaysan marnaba hor fadhiisan doonin dowlada kmg ah iyagoo sharuud uga dhigay wadahadalada in marka hore meel la isla dhigo qaabkii ciidamada itoobiya ay dalka uga bixi lahaayeen.

Daahir Maxamuud Geele oo ka tirsan xubnaha ka socda dhinaca Mucaaradka ee kusugan dalka jabuuti ayaa sheegay inay diidan yihiin inay kulamo la yeeshaan wefdiga soomaalida ah ee jabuuti jooga,laakin waxa uu sheegay inaysan diidanayn inay la kulmaan oo ay fuliyaan balantii ay la galeen Mas’uuliyiinta qaramada midoobay ee uu hogaaminayo wakiilka gaarka ah ee xoghayaha qaramada midoobay u qaabilsan soomaaliya Axmedou waldi Cabdalla.

Ururka dib u xoreynta soomaaliya oo la aaminsanyahay inay qeyb lixaad leh ka ciyaarayaan dagaalada ciidamada itoobiya ku haysta gudaha soomaaliya ayaa doonaya in qaramada midoobay ay kala hadlaan hanaanka ciidamadaasi looga bixin karo dalka soomaaliya taasoo fure u noqon doonta inay dowladda iyo mucaaradku heshiiyaan.