ciidamo itoobiyaan ah oo lagu wareeray Muqdisho iyo Sh.hoose.

(Mogadishu, Monday,12,May 2008,(Hornafrik Media)

kolanyo gaadiid ah oo ay wateen ciidamo itoobiyaan ah ayaa maanta weeraro qaraxyo ah la gula beegsaday meel ku dhaw deegaanka leego ee gobolka Shabeelaha Hoose,halkaasoo ciidamada itoobiya looga gubay gaadiid.

Sida ay xaqiijiyeen dad goobjooyaal ah kolanyo ciidamada itoobiya wateen oo saakay ka tagay Magaalada Baydhabo kuna socday magaalada Muqdisho ayaa lagu weeraray inta u dhaxaysa tuulada Leego iyo degmada Buur Hakaba xili ay wadada marayeen.

Ciidamada ayaa la sheegay in weerarkaasi looga gubay ilaa sadex ka tirsan gaadiidka nuuciisu yahay Uraalka oo ay ciidamo itoobiyaan ah saarnayeen wallow aan la ogayn khasaaraha nafeed ee gaaray ciidamadaas.

Ciidamada ayaa isku fidiyay meel 5km u jirta tuulada leego kuwaas dad isagu jira odoyaal iyo dhalinyaro ka qab qabtay deegaankaasi waxana ay joojiyeen isku socodkii dadka iyo gaadiidka u kala gooshayay Muqdisho iyo Baydhabo.

Waa weerarkii labaad oo ciidamada itoobiya mudo labo todobaad gudahood ah loogu gaystay shabeeelaha Hoose,iyadoo horayna khasaare xoogan uu ka soo gaaray ciidamada itoobiya.

Dhanka kale wararka ka iimanaya degmada Bardaale ee gobolka Baay ayaa sheegaya in gacan ku haynta degmadaasi ay la wareegeen xoogaga Al shabaab arroorinimadii hore ee saakay.

Ciidamada Al shabaab ayaa la sheegayaa in si nabadgalyo ah ay ku galeen Magaalada,iyadoo wax iska hor’imaad ah uusan halkaasi ka dhicin.

Dhinaca kale labo askari oo ka tirsanaa ciidamada itoobiya ayaa ku geeriyootay qarax maanta la gula beegsaday ciidamadaasi agagaarka xaruntii hore talefishinka ee deegaanka towfiiq Magaalada Muqdisho.

Ciidamadaan ayaa la sheegay in markii la qarxinayay ay wateen gaari gacale gaadiidka loo yaqaan kuwaas oo saarnaayeen raashin ay wateen ciidamada itoobiya waxana gaari gacalayaamadaasi u waday dad soomaali ah.